South 160th Street
ដើម្បីសម្រួលការផ្លាស់ប្តូរលំនាំចរាចរណ៍ និងកែលម្អសុវត្ថិភាព WSDOT នឹងសង់ឡើងវិញនូវផ្លូវបំបែកប្ដូរទិស SR 509/South 160th Street ដោយបន្ថែមរង្វង់មូល។
បើលោកអ្នករស់នៅក្បែរ ធ្វើការក្បែរ ឬធ្វើដំណើរឆ្លងកាត់ផ្លូវបំបែកប្ដូរទិស SR 509/South 160th Street វានឹងមានសំឡេងរំខាន ធូលី និងការផ្លាស់ប្តូរលំនាំចរាចរណ៍ដែលជាទូទៅដោយសារការសាងសង់ផ្លូវ។
ការងារអំពីផ្លូវបំបែកប្ដូរទិស SR 509/South 160th Street បានចាប់ផ្តើមនៅក្នុងរដូវក្តៅឆ្នាំ 2024 ដោយចាប់ធ្វើពីការងារសាងសង់ប្រព័ន្ធរំដោះទឹក។ ការងារនៅផ្លូវបំបែកប្ដូរទិស SR 509/South 160th Street នឹងតម្រូវឱ្យបិទផ្លូវ South 160th Street នៅចុងសប្តាហ៍។ យើងនឹងចែករំលែកព័ត៌មានបន្ថែមនៅពេលមានកាលបរិច្ឆេទសម្រេចបិទផ្លូវ។ នឹងរក្សាឱ្យអាចចេញចូលក្នុងមូលដ្ឋានទៅកន្លែងអាជីវកម្មនិងលំនៅដ្ឋានបាន។
រង្វង់មូល
ការសិក្សាបានបង្ហាញថា រង្វង់មូលមានសុវត្ថិភាពជាងផ្លូវប្រសព្វដែលគ្រប់គ្រងដោយសញ្ញាចរាចរណ៍ ឬស្លាកសញ្ញាឈប់បែបប្រពៃណី។ ដើម្បីស្វែងយល់បន្ថែមអំពីរបៀបធ្វើដំណើរឆ្លងកាត់រង្វង់មូល ក្នុងនាមជាថ្មើរជើង អ្នកជិះកង់ ឬអ្នកបើកបរ សូមពិនិត្យមើល គេហទំព័រ
សុវត្ថិភាពចរាចរណ៍រង្វង់មូល របស់ WSDOT។
ជញ្ជាំងទប់សំឡេង
ជញ្ជាំងទប់សំឡេងមួយនឹងសង់នៅខាងត្បូងឆៀងខាងលិចនៃផ្លូវបំបែកប្ដូរទិស SR 509/South 160th Street តាមបណ្តោយផ្លូវចូលទៅផ្លូវធំ SR 509 ដែលឆ្ពោះទៅខាងត្បូង។ ជញ្ជាំងទប់សំឡេងទីពីរនឹងសង់នៅខាងជើងឆៀងខាងកើតនៃផ្លូវបំបែកប្ដូរទិស SR 509/South 160th Street នៅចន្លោះផ្លូវ Fourth Avenue South និងផ្លូវ SR 509 ដែលឆ្ពោះទៅខាងជើង។
បើលោកអ្នករស់នៅក្បែរជញ្ជាំងទប់សំឡេងណាមួយដែលគេគ្រោងសង់ នៅជុំវិញផ្លូវបំបែកប្ដូរទិស SR 509/South 160th Street លោកអ្នកនឹងរំពឹងបានថាមានក្រុមស្ទង់មតិទាក់ទងទៅលោកអ្នកមុនពេលការសាងសង់ចាប់ផ្តើម។ ក្នុងអំឡុងពេលសាងសង់ ក្រុមការងារនឹងប្រើប្រាស់គ្រឿងចក្រដើម្បីជីកធ្វើគ្រឹះជញ្ជាំងទប់សំឡេង បង្ហាប់ដី ចាក់បេតុងធ្វើគ្រឹះជញ្ជាំងទប់សំឡេង និងដំឡើងផ្ទាំងបេតុងថ្មីៗ។ ការសាងសង់ជញ្ជាំងទប់សំឡេងនឹងមានរយៈពេលប្រាំមួយទៅប្រាំបួនខែអាស្រ័យលើលក្ខខណ្ឌនៃការដ្ឋាន។
អ្នកម៉ៅការត្រូវបានតម្រូវឱ្យបំពេញតាមអញ្ញត្រកម្មសំឡេងរំខានក្នុងមូលដ្ឋាន ហើយនឹងចាត់វិធានការបន្ថយសំឡេងរំខាន និងសកម្មភាពសាងសង់ដែលអាចរំខានឱ្យនៅតិចបំផុត។ ឧត្ដមានុវត្តសម្រាប់គ្រប់គ្រងសំឡេងរំខាន និងការសាងសង់នៅជិតកន្លែងប្រជាជននិងអាជីវកម្មរួមមាន៖
- ការជូនដំណឹងជាមុនដល់អ្នករស់នៅក្បែរនោះអំពីការងារពេលយប់ដែលមានសំឡេងរំខាន។
- ការផ្សើមដីកុំឱ្យហុយធូលី។
- ការទ្រាប់បាតឡានដឹកជាជំនួយដល់ការចាក់វត្ថុធាតុសំណង់ និងបន្ថយការខ្ទប់ទ្វារក្រោយឡានដឹកកុំឱ្យឮខ្លាំង។
មានសំណួរ ឬកង្វល់ដែរទេ?
បើលោកអ្នកមានសំណួរ ឬកង្វល់អំពីសំណង់នៅពេលណាមួយ លោកអ្នកអាចទាក់ទងក្រុមការងាររបស់យើងបានគ្រប់ពេលតាមលេខទូរសព្ទទាន់ហេតុការណ៍ 24 ម៉ោង 206-225-0674 ឬអ៊ីមែល SR509Construction@wsdot.wa.gov។